Amis-Athois
Vos saveu sûrmée qu'eul Chorâle Récont fiète ses quarante ans c'nannée chi.Je n'sée gnieu si y d'a branmée dauchi
qui s'souvieut' tentdu promieu cop qu'elle a canteu les Vièppes Gouyasse? Ouin? I d'a?
C'ètoit ée Mil' neuf chée septante tois! Ca faisoit djà enne dizaine d'années qu'les Vièppes Gouyasse ètin'te
modernisées pau Doyen Kaizer.
Dée l'temps, c'ètoit enne vrée cèrémonie religieuse, les Vièppes.
On cantoit ée latin! C'ètoit normal, puisque no Ducasse, au début c'ètoit l'fiète de Saint Juyen.
Eul 28 d'Août.
On vieut d'vos canteu "l'hymne à Saint Juyen".
E beu, c'eut l'traduction du cantique ée latin "O Juliane" qu'on cantoit dée l'temps.
L'Doyen Kaizer s'a dit: "Ces Vièppes-là, ça n'intéresse pus les gées".
E c'ètoit bieu vrée. Vos n'me croireus gnieu, Mayeur! Bon an, mal an, i n'avoit gnieu pu d'gées, qu'achteur au 21 juillet.
Donc, eul Doyen Kaizer a fé v'ni eul chorâle Sainte Barbe eud Frameries.
C'ètoit ée 1962. E co l'année d'apreu.Les gées ont c'mécheu à r'veni.
Il a follu réserveu ses plaches.
C'ètoit l'petit Fred, eul sècrètaire paroissial qui faisoit les réservâtions è qui mèttoit les kèyères.
C'tà ç'moumée-là ètou, qu'eul Doyen Kaizer s'a dit: I nos fauroit ènne chorâle.
On ètoit ée 1965. Au début, ça n'étoit foc des fiyes.
Puis il a quéques hommes qu'ont v'nu avec. Gnieu vrée, Raymond? On avoit ein vicaire, Jacque Thunus qu'ètoit bon
musicien. Aveu li, on s'a mis à canteu à quat'voix.
Les feummes? C'ètoit des jônes gamines, aveu leu courtès jupes noires, è leu blanquès cauchettes su leu m'ptits molleuts.
Meu, i n'faut gnieu é dire de maux, pasqu'elles cantin'te djà bieu! I d'a
(gnieu branmée, ènon Sabine) qui cant'te co.
Il avoit même tois quat' jônès soeurs de Saint François qui cantin'tent avec.
Achteur, elles can'te co à messe.
Bieu seur, leu ch'veux n'sont pu si noirs! Enfin, elles, elles d'ont co!
Les promieus cops, quand on cant' lainsi, ée public, vos n'poveu gnieu savoir comme on eut émotionneu!
On a les swesses! C'eut l'trac, comme i dittent les acteurs.
Est-c'que j'peux chi vos raconteu enne petite histoire?
Ouin? Enfin puisque c'eut l'anniversaire d'eul chorâle Récontre, vos permètteu, Mossieu l'Doyen?Eul promieu
cop qu'on a canteu enne Messe de Noé à quat'voix, bieu avant les Vièppes Gouyasse, eul vicaire Thunus
nos avoit appris les cantiques.
C'étoit ée françeus, bieu seur. Dée les années 65, on étoit djà apreu l'concile.
A l'chorâle, tout l'monde ètoit aussi sèrreu qu'ein éfant d'chinq ans d'vant Saint Nicolas! Alors pou guèri leu trac, euj'leu
dounnois ènne petit' pilule noire (neul rèpèteu gnieu, pas'que c'eut du charlatanisme).
Vos saveu bieu les p'tites pilules "Picfort"! Les plus anciens s'souvieut'te bieu des "Curix" d'é ènne boite é fièr...
J'leu disois: c'eut pou vo voix.
Apreu l'évangile, pèdant qu'eul Doyen Kaizer faisoit s'sermon, on nos avoit pèrmis d'nos assire dée les stalles.
Bieu contée d'souffleu ein cop.Meu les jônes gamines c'méchin'te à avoir leu gosieu sec. L'émôtion.
Les gées qui vos ravis'tent. Vos man qui fé signe!
I d'a ènne qui dit à s'visenne: "d'mand' ein cop, au docteur ènne petit' pilule".
Eul message eus transmet sans qu'personne n'eul veyiche!
J'attée qu'eul Doyen criyche bieu fort, pou ouvri l'couverte d'eul boite, pasque ça fé clac, ènon!
Bon, ça va. Eul boite passe de main ée main.
Meu tout d'ein cop, y d'a ènne, dée ènne stalle de d'vant, bieu seur, qui ley' quayï l'couverte é fier...
Justemée, l'doyen finichoit s'sermon. E, dée l'silence d'eul méditâtion, l'couvert' é fier eus s'meut
à rouleu, à rouleu, su l'pav'mée du choeur, è à tourneu, è à tourneu... è tout d'ein cop, clac, i quait!
Je n'sée gnieu si l'doyen l'a étèdu, meu à l'fin d'eul messe, il eut v'nu nos féliciteu!
Quée belle fiète de Noé!
On n'peut gnieu parleu d'chorâle à Ath, sans péseu à Léon Jouret.
Co ein anniversaire! Savée bieu qu'il a juste cent ans, chée, qu'il eut mort. Ouin, ée 1905.
Il ètoit né à Ath ée 1828. Eus papa, Théodore Jouret, ètoit préfet d' l'Athénée, comme on dit achteur.
Alors, on disoit Principal du Collège Communal d'Ath.Comme Léon étoit bon musicien, il a éteu à l'ècole de musique, qui
v'noit juste de s'ouvri ée 1835.
Apreu, il eut parti au conservatoire de Bruxelles, usqu'il eut dev'nu professeur de chant chorâl.
Si nos villes a douneu s'nom à ènn' av'nue, c'eut qu'il ètoit dev'nu célèbre.
T'tà l'heure, nos vos cent'rons ènne de ses 24 canchons du Pays d'Ath.
On a toudis aîmeu d'canteu, à Ath.
C'eut léesi, qu'dée les années 1908, on a créieu ènne socièteu: "les Disciples de Jouret".
A gnieu confond' aveu "Les Matelots de la Dendre", qui sont co bieu vivants, achteur! Enon Jean-Claude!
Comme dauchi, on aîme bieu d'compliqueu les affaires, ée 1925, y d'a oü enne deuxième qui s'a appèleu: "
Les Vrais Disciples de Jouret". Leu chef c'ètoit Armand Lempers, eul directeur de l'ècole de musique.
Eum papa juwoit du violon dée l'orchestre è m'gand'pée cantoit dée les Disciples de Jouret, les vrées naturell'mée.
D'apreu li, c'ètoit ènne chorale comme on n'davoit jamée vu, è comme on n'dé véroit jamée pus
(même Récontre euj suppose)! Comme il ètoit bel hommes, aveu s'moustache qui frisoit, on
l'avoit mis au promieu rang des canteus.
Je n'sais gnieu si y cantoit bieu, meu, c'eut li qui m'eul l'a raconteu, Lempers li avoi dit: "
Georges, vos faites bien dalleu vos machelles, è vos bouche, meu je n'veux gnieu étenne vos voix!"
Vos veyeus, Lempers n'ètoit gnieu seul'mée ein bon musicien, meu c'ètoit ein fin chef!
J'arvieus ée 1973, quand eul Chorale Récontre a canteu les Vièppes Gouyasse pou l'promieu cop.
Pou ç'n'occasion-là, on avoit rèuni l'chorale Saint Juyen è les hommes d'eul chorale Saint Martin, aveu leu chef
Camille Cuvelier. C'eut lési qu'on s'a appèleu "Rencontre".
C'ètoit René Berte qui dirigeoit l'chorale.
Je n'vos rappellerai gnieu dauchi l'succès qu'on a oü! Les gées brayin'te d'étenne canteu dée leu patois, dée
leu n'église!
Les Vièppes Gouyasse sont dev'nues ein "must incontournable" comme on dit achteur.
Pou les cieuns qui counoit'te gnieu l'latin, ça veut dire ènne "obligâtion inoxydable".
J' vos parlois d'Camille Cuvelier. Li ètou, juwoit du violon dée l'orchestre de Lempers.
E j'ai dècouvert, i n'a gnieu lonmée, eul dernière des canteuses des disciples de Jouret.
Vos n'me croireus gnieu! Madame Cuvelier, Marcelle, eul feumme de Camille, cantoit dée les disciples!
E savée bieu d'cau? Elle vieut juste d'avoir cent ans!Ouin! Chée! Dée s'discrètion, c'eut passeu inaperçu.
Meu Marcelle Cuvelier eut centenaire d'puis l'promieu mai. Si elle nos acoute, euj li dis: "
Marcelle, Bon Anniversaire"! Sinon j'demande à s'fyie, Yolande Decaestecker, de li transmette nos
félicitâtions à nous aut' tertoutes dauchi! Gnieu vrée?
Pou féteu s'centenaire, è co pou l'anniversaire d'eul Chorale Rencontre, è co pou l'cieun d'Jouret, euj vos
invite à canteu aveu mi: "Joyeux Anniversaire".
Vos counicheu?
 

 

 

 
 



Créer un site
Créer un site